chale aao agar dam bhar ko tum to ye jata rahe fil-faur maraz

chale aao agar dam bhar ko tum to ye jaatā rahe fil-faur maraz

ki nahīñ hai ba-juz bīmārī-e-ġham mirī jaan mujhe koī aur maraz

nahīñ kahtā maiñ tum se ki chāra karo magar aa ke kabhī kabhī dekh to lo

ki samajhtā nahīñ hai tabīb koī hai tumhāre hī qābil-e-ġhaur maraz

mire īsā-dam mire be-parvā na ilaaj se mere haath uThā

nahīñ bachne kā ye marīz tirā ki hai baḌhtā chalā be-taur maraz

nahīñ is kā ta.ajjub yaaro agar mire dil meñ dard ho rah rah kar

kare ġhaflat īsī-e-daurāñ jab tū na bāñdhe kyūñ-kar daur maraz

tujhe 'anjum' dard-e-firāq bhalā kyuuñ chain se uThne baiThne de

vo masīh na jab kuchh rahm kare kare kyuuñ na jafā-o-jaur maraz

chale aao agar dam bhar ko tum to ye jata rahe fil-faur maraz

ki nahin hai ba-juz bimari-e-gham meri jaan mujhe koi aur maraz

nahin kahta main tum se ki chaara karo magar aa ke kabhi kabhi dekh to lo

ki samajhta nahin hai tabib koi hai tumhaare hi qabil-e-ghaur maraz

mere isa-dam mere be-parwa na ilaj se mere hath uTha

nahin bachne ka ye mariz tera ki hai baDhta chala be-taur maraz

nahin is ka tajjub yaro agar mere dil mein dard ho rah rah kar

kare ghaflat isi-e-dauran jab tu na bandhe kyun-kar daur maraz

tujhe 'anjum' dard-e-firaq bhala kyun chain se uThne baiThne de

wo masih na jab kuchh rahm kare kare kyun na jafa-o-jaur maraz