chale bhi aao ki dil ko zara qarar nahin

chale bhī aao ki dil ko zarā qarār nahīñ

ḳhudā gavāh ki ab tāb-e-intizār nahīñ

nahīñ ki dil pe mohabbat meñ iḳhtiyār nahīñ

nahīñ nahīñ mujhe fikr-e-ma.āl-e-kār nahīñ

ba-qadr-e-josh-e-junūñ chaak ho garebāñ kyā

bahār bhī to ba-andāza-e-bahār nahīñ

ajiib haal hai is daur-e-zar-garī meñ kahīñ

sivā.e dil koī dard-āshnā-e-yār nahīñ

ab aur is ke sivā ehtiyāt-e-ishq ho kyā

ki terā ġham mirī sūrat se āshkār nahīñ

na jaane kaun sā aalam hai ye mohabbat kā

hameñ ḳhayāl hai apnā ḳhayāl-e-yār nahīñ

nigāh-e-yār ne pahuñchā diyā kahāñ 'aḳhtar'

ki ham ko apnī nigāhoñ kā e.atibār nahīñ

chale bhi aao ki dil ko zara qarar nahin

KHuda gawah ki ab tab-e-intizar nahin

nahin ki dil pe mohabbat mein iKHtiyar nahin

nahin nahin mujhe fikr-e-maal-e-kar nahin

ba-qadr-e-josh-e-junun chaak ho gareban kya

bahaar bhi to ba-andaza-e-bahaar nahin

ajib haal hai is daur-e-zar-gari mein kahin

siwae dil koi dard-ashna-e-yar nahin

ab aur is ke siwa ehtiyat-e-ishq ho kya

ki tera gham meri surat se aashkar nahin

na jaane kaun sa aalam hai ye mohabbat ka

hamein KHayal hai apna KHayal-e-yar nahin

nigah-e-yar ne pahuncha diya kahan 'aKHtar'

ki hum ko apni nigahon ka eatibar nahin