chale hain kaise wo muTThi mein dil chhupae hue

chale haiñ kaise vo muTThī meñ dil chhupā.e hue

nazar churā.e hue aañkh ko bachā.e hue

kisī kī shoḳhī-e-raftār ke miTā.e hue

uThe jo hashr ke din bhī to kasmasā.e hue

nahīñ hai manzil-e-maqsūd duur ai sālik

qasam ḳhudā kī chalā chal qadam baḌhā.e hue

hayā bhī naaz hai lekin na is qadar zālim

ki ḳhvāb meñ bhī jo aa.e to muñh chhupā.e hue

javāb shikva-e-jaur-o-jafā ke azbar haiñ

sabaq ravāñ haiñ unheñ ġhair ke paḌhāye hue

na jaa.eñ bazm-e-adū meñ ki pās-e-tamkīñ hai

havā-e-dīd na le jaa.e gar uḌaa.e hue

samajh liyā thā ga.e aap dīn-o-duniyā se

sunā jo hazrat-e-dil haiñ kisī pe aa.e hue

tumhāre kūche meñ aġhyār to nahīñ aate

kisī ke naqsh-e-qadam se haiñ kuchh miTā.e hue

rah-e-talāsh meñ aaya na chain ham ko 'mehr'

ki ḳhār-e-rāh the talvoñ pe ḳhaar khaa.e hue

chale hain kaise wo muTThi mein dil chhupae hue

nazar churae hue aankh ko bachae hue

kisi ki shoKHi-e-raftar ke miTae hue

uThe jo hashr ke din bhi to kasmasae hue

nahin hai manzil-e-maqsud dur ai salik

qasam KHuda ki chala chal qadam baDhae hue

haya bhi naz hai lekin na is qadar zalim

ki KHwab mein bhi jo aae to munh chhupae hue

jawab shikwa-e-jaur-o-jafa ke azbar hain

sabaq rawan hain unhen ghair ke paDhaye hue

na jaen bazm-e-adu mein ki pas-e-tamkin hai

hawa-e-did na le jae gar uDae hue

samajh liya tha gae aap din-o-duniya se

suna jo hazrat-e-dil hain kisi pe aae hue

tumhaare kuche mein aghyar to nahin aate

kisi ke naqsh-e-qadam se hain kuchh miTae hue

rah-e-talash mein aaya na chain hum ko 'mehr'

ki KHar-e-rah the talwon pe KHar khae hue