چلے ہیں کیسے وہ مٹھی میں دل چھپائے ہوئے

چلے ہیں کیسے وہ مٹھی میں دل چھپائے ہوئے

نظر چرائے ہوئے آنکھ کو بچائے ہوئے

کسی کی شوخئ رفتار کے مٹائے ہوئے

اٹھے جو حشر کے دن بھی تو کسمسائے ہوئے

نہیں ہے منزل مقصود دور اے سالک

قسم خدا کی چلا چل قدم بڑھائے ہوئے

حیا بھی ناز ہے لیکن نہ اس قدر ظالم

کہ خواب میں بھی جو آئے تو منہ چھپائے ہوئے

جواب شکوۂ جور و جفا کے ازبر ہیں

سبق رواں ہیں انہیں غیر کے پڑھائے ہوئے

نہ جائیں بزم عدو میں کہ پاس تمکیں ہے

ہوائے دید نہ لے جائے گر اڑائے ہوئے

سمجھ لیا تھا گئے آپ دین و دنیا سے

سنا جو حضرت دل ہیں کسی پہ آئے ہوئے

تمہارے کوچے میں اغیار تو نہیں آتے

کسی کے نقش قدم سے ہیں کچھ مٹائے ہوئے

رہ تلاش میں آیا نہ چین ہم کو مہرؔ

کہ خار راہ تھے تلووں پہ خار کھائے ہوئے