chale the bhar ke ret jab safar ki jism-o-jaan mein hum

chale the bhar ke ret jab safar kī jism-o-jāñ meñ ham

to sāhiloñ kā aks dekhte the bādbāñ meñ ham

tuyūr the jo ghoñsloñ meñ paikaroñ ke uḌ ga.e

akele rah ga.e haiñ apne ḳhvāb ke makāñ meñ ham

hamārī justujū bhī ab to ho ga.ī hai gard gard

ki naqsh-e-pā ko DhūñDte haiñ rah ke har nishāñ meñ ham

ishāriyat thī be-zabāñ thā lafz lafz dāstāñ

sunāte kis tarah ki gum the ḳhud hī dāstāñ meñ ham

baras rahī hai āsmāñ se misl-e-sañg tīrgī

khaḌe haiñ kab se terī aarzū ke sā.ebāñ meñ ham

zamīñ kā dard be-badan bhī ho ke apne dil meñ thā

tabhī to khiñch ke aa ga.e the varna āsmāñ meñ ham

nafas nafas hai zindagī kā kārobār muntashar

divāliya hue ki jab se aa.e is jahāñ meñ ham

chale the bhar ke ret jab safar ki jism-o-jaan mein hum

to sahilon ka aks dekhte the baadban mein hum

tuyur the jo ghonslon mein paikaron ke uD gae

akele rah gae hain apne KHwab ke makan mein hum

hamari justuju bhi ab to ho gai hai gard gard

ki naqsh-e-pa ko DhunDte hain rah ke har nishan mein hum

ishaariyat thi be-zaban tha lafz lafz dastan

sunate kis tarah ki gum the KHud hi dastan mein hum

baras rahi hai aasman se misl-e-sang tirgi

khaDe hain kab se teri aarzu ke saeban mein hum

zamin ka dard be-badan bhi ho ke apne dil mein tha

tabhi to khinch ke aa gae the warna aasman mein hum

nafas nafas hai zindagi ka karobar muntashar

diwaliya hue ki jab se aae is jahan mein hum