chali hai aaj falak par meri fughan ki baat

chalī hai aaj falak par mirī fuġhāñ kī baat

ga.ī kahāñ se kahāñ tak ġham-e-nihāñ kī baat

kalī kalī meñ na paḌ jaa.e jaan to kahnā

chaman meñ chheḌ ke dekho mirī zabāñ kī baat

vahī qafas kī zabāñ-bandiyāñ yahāñ bhī haiñ

ham āshiyāñ meñ kareñ kaise āshiyāñ kī baat

mirī jabīñ ke fasāne ko bhūlne vaale

jo maiñ bhī bhuul gayā tere āstāñ kī baat

unhīñ se un ke sitam kī kareñ shikāyat kyā

ham āsmāñ se kareñ jaur-e-āsmāñ kī baat

adā-e-jaur ko niiñd aa ga.ī magar 'muslim'

huī na ḳhatm abhī mere imtihāñ kī baat

chali hai aaj falak par meri fughan ki baat

gai kahan se kahan tak gham-e-nihan ki baat

kali kali mein na paD jae jaan to kahna

chaman mein chheD ke dekho meri zaban ki baat

wahi qafas ki zaban-bandiyan yahan bhi hain

hum aashiyan mein karen kaise aashiyan ki baat

meri jabin ke fasane ko bhulne wale

jo main bhi bhul gaya tere aastan ki baat

unhin se un ke sitam ki karen shikayat kya

hum aasman se karen jaur-e-asman ki baat

ada-e-jaur ko nind aa gai magar 'muslim'

hui na KHatm abhi mere imtihan ki baat