چلئے مشکل ہے اگر جینا تو مر جاتے ہیں

چلئے مشکل ہے اگر جینا تو مر جاتے ہیں

بوجھ ہم روح پہ اپنی ہیں اتر جاتے ہیں

خود کو آئینہ بنا رکھا ہے جب سے ہم نے

اس طرف دیکھنے کیا اہل نظر جاتے ہیں

با وفا ہوں تو مرے ساتھ وہ چل کر دیکھیں

راہ ایثار سے ہم کیسے گزر جاتے ہیں

لازمی دل کے لیے دیدۂ بینا کرنا

تیرے احساس مرے دل میں اتر جاتے ہیں

ہم عنا گیر ہیں خود اپنی تمناؤں کے

کون پوچھے انہیں جائیں وہ جدھر جاتے ہیں

یار ارشادؔ کہاں چل دئے منزل بھی نہیں

پوچھ لیتے ہیں ابھی خود سے کدھر جاتے ہیں