چلنا انہیں گوارا نہیں خاکدان پر

چلنا انہیں گوارا نہیں خاکدان پر

رکھ دے کوئی اٹھا کے زمین آسمان پر

جیسے جہاں میں کوئی گنہ گار ہی نہیں

بس اک ہمارا نام ہے سب کی زبان پر

اس کو بھی کوئی اس کی طرح سے نہ دھوکا دے

آئے نہ ایسا وقت مرے مہربان پر

ہم تو بس اک نگاہ میں پہچان جاتے ہیں

چلتے ہیں کھوٹے سکے کہاں ہر دکان پر

خیرات اپنے حسن کی صدقہ جمال کا

سائل کھڑا ہوا ہے تمہارے مکان پر

کی فکر جس نے جان کی مارا گیا وہی

وہ بچ گیا جو کھیل گیا اپنی جان پر

طوفاں میں خضرؔ ناؤ ہے تو کر خدا کو یاد

اتنا بھروسا اچھا نہیں بادبان پر