chalna unhen gawara nahin KHak-dan par

chalnā unheñ gavārā nahīñ ḳhāk-dān par

rakh de koī uThā ke zamīn āsmān par

jaise jahāñ meñ koī gunahgār hī nahīñ

bas ik hamārā naam hai sab kī zabān par

us ko bhī koī us kī tarah se na dhokā de

aa.e na aisā vaqt mire mehrbān par

ham to bas ik nigāh meñ pahchān jaate haiñ

chalte haiñ khoTe sikke kahāñ har dukān par

ḳhairāt apne husn kī sadqa jamāl kā

saa.il khaḌā huā hai tumhāre makān par

kī fikr jis ne jaan kī maarā gayā vahī

vo bach gayā jo khel gayā apnī jaan par

tūfāñ meñ 'ḳhizr' naav hai to kar ḳhudā ko yaad

itnā bharosā achchhā nahīñ bādbān par

chalna unhen gawara nahin KHak-dan par

rakh de koi uTha ke zamin aasman par

jaise jahan mein koi gunahgar hi nahin

bas ek hamara nam hai sab ki zaban par

us ko bhi koi us ki tarah se na dhoka de

aae na aisa waqt mere mehrban par

hum to bas ek nigah mein pahchan jate hain

chalte hain khoTe sikke kahan har dukan par

KHairaat apne husn ki sadqa jamal ka

sail khaDa hua hai tumhaare makan par

ki fikr jis ne jaan ki mara gaya wahi

wo bach gaya jo khel gaya apni jaan par

tufan mein 'KHizr' naw hai to kar KHuda ko yaad

itna bharosa achchha nahin baadban par