chalo baad-e-bahaari ja rahi hai

chalo bād-e-bahārī jā rahī hai

piyā-jī kī savārī jā rahī hai

shumāl-e-jāvedān-e-sabz-e-jāñ se

tamannā kī amārī jā rahī hai

fuġhāñ ai dushman-e-dār-e-dil-o-jāñ

mirī hālat sudhārī jā rahī hai

hai pahlū meñ Take kī ik hasīna

tirī furqat guzārī jā rahī hai

jo in rozoñ mirā ġham hai vo ye hai

ki ġham se burdbārī jā rahī hai

hai siine meñ ajab ik hashr barpā

ki dil se be-qarārī jā rahī hai

maiñ paiham haar kar ye sochtā huuñ

vo kyā shai hai jo haarī jā rahī hai

dil us ke rū-ba-rū hai aur gum-sum

koī arzī guzārī jā rahī hai

vo sayyad bachcha ho aur shaiḳh ke saath

miyāñ izzat hamārī jā rahī hai

hai barpā har galī meñ shor-e-naġhma

mirī fariyād maarī jā rahī hai

vo yaad ab ho rahī hai dil se ruḳhsat

miyāñ pyāroñ kī pyārī jā rahī hai

dareġhā terī nazdīkī miyāñ-jān

tirī duurī pe vaarī jā rahī hai

bahut bad-hāl haiñ bastī tire log

to phir tū kyuuñ sañvārī jā rahī hai

tirī marham-nigāhī ai masīhā

ḳharāsh-e-dil pe vaarī jā rahī hai

ḳharābe meñ ajab thā shor barpā

diloñ se intizārī jā rahī hai

chalo baad-e-bahaari ja rahi hai

piya-ji ki sawari ja rahi hai

shumal-e-jawedan-e-sabz-e-jaan se

tamanna ki amari ja rahi hai

fughan ai dushman-e-dar-e-dil-o-jaan

meri haalat sudhaari ja rahi hai

hai pahlu mein Take ki ek hasina

teri furqat guzari ja rahi hai

jo in rozon mera gham hai wo ye hai

ki gham se burdbari ja rahi hai

hai sine mein ajab ek hashr barpa

ki dil se be-qarari ja rahi hai

main paiham haar kar ye sochta hun

wo kya shai hai jo haari ja rahi hai

dil us ke ru-ba-ru hai aur gum-sum

koi arzi guzari ja rahi hai

wo sayyad bachcha ho aur shaiKH ke sath

miyan izzat hamari ja rahi hai

hai barpa har gali mein shor-e-naghma

meri fariyaad mari ja rahi hai

wo yaad ab ho rahi hai dil se ruKHsat

miyan pyaron ki pyari ja rahi hai

daregha teri nazdiki miyan-jaan

teri duri pe wari ja rahi hai

bahut bad-haal hain basti tere log

to phir tu kyun sanwari ja rahi hai

teri marham-nigahi ai masiha

KHarash-e-dil pe wari ja rahi hai

KHarabe mein ajab tha shor barpa

dilon se intizari ja rahi hai