چلو دل کی کہانی کو مکمل کر دیا جائے

چلو دل کی کہانی کو مکمل کر دیا جائے

بچی ہے جو جگہ خالی اسے بھی بھر دیا جائے

کرے اب پیار کا اقرار یا انکار کر دے وہ

محبت کے لیے اظہار اس سے کر دیا جائے

نگاہوں سے چھلکتا ہے عجب ہے عشق کا قصہ

چھلکنے کو ضروری ہے رگوں میں بھر دیا جائے

ہماری آنکھ سے کہنے لگے ہیں خواب رو رو کر

بھٹکتے پھر رہے ہیں ہم ہمیں بھی گھر دیا جائے

جدھر دیکھوں ادھر ہی رہزنوں کی بھیڑ ہے مولیٰ

سفر میں ساتھ چلنے کو مجھے رہبر دیا جائے

نہیں یہ سوچنا اس کھیل میں کیا فیصلہ ہوگا

لگا لی شرط تو اب اوکھلی میں سر دیا جائے