چلو غزل میں کچھ ایسا بھی آزمایا جائے

چلو غزل میں کچھ ایسا بھی آزمایا جائے

ردیف خود کو اسے قافیہ بنایا جائے

وہ کہہ رہی تھی ہوا بن کے شب میں آؤں گی

سو اب چراغ کی صورت بدن جلایا جائے

جنون ایذا پسندی تو ہے طبیعت میں

ہمارے زخم پہ پھر سے نمک لگایا جائے

وہ خشک ہونٹوں پہ میرے سوال کرتی ہے

تو کیا لبوں کا تقاضا اسے بتایا جائے

جو دل پہ ہو گیا تحریر اس کا کیا ہوگا

مگر وہ کہتا ہے ہر لفظ اب مٹایا جائے

بہت دنوں سے نشہ میں ہوں ہوش کی خاطر

پھر آج شام کو پانی میں کچھ ملایا جائے

مشاعرے کی ہو فہرست جاری جو دلبرؔ

تو اب کے شاہ تغزل کو بھی بلایا جائے