chalo ghazal mein kuchh aisa bhi aazmaya jae

chalo ġhazal meñ kuchh aisā bhī āzmāyā jaa.e

radīf ḳhud ko use qāfiya banāyā jaa.e

vo kah rahī thī havā ban ke shab meñ ā.ūñgī

so ab charāġh kī sūrat badan jalāyā jaa.e

junūn-e-īzā-pasandī to hai tabī.at meñ

hamāre zaḳhm pe phir se namak lagāyā jaa.e

vo ḳhushk hoñToñ pe mere savāl kartī hai

to kyā laboñ kā taqāzā use batāyā jaa.e

jo dil pe ho gayā tahrīr us kā kyā hogā

magar vo kahtā hai har lafz ab miTāyā jaa.e

bahut dinoñ se nashe meñ huuñ hosh kī ḳhātir

phir aaj shaam ko paanī meñ kuchh milāyā jaa.e

mushā.ere kī ho fihrist jaarī jo 'dilbar'

to ab ke shāh-e-taġhazzul ko bhī bulāyā jaa.e

chalo ghazal mein kuchh aisa bhi aazmaya jae

radif KHud ko use qafiya banaya jae

wo kah rahi thi hawa ban ke shab mein aaungi

so ab charagh ki surat badan jalaya jae

junun-e-iza-pasandi to hai tabiat mein

hamare zaKHm pe phir se namak lagaya jae

wo KHushk honTon pe mere sawal karti hai

to kya labon ka taqaza use bataya jae

jo dil pe ho gaya tahrir us ka kya hoga

magar wo kahta hai har lafz ab miTaya jae

bahut dinon se nashe mein hun hosh ki KHatir

phir aaj sham ko pani mein kuchh milaya jae

mushaere ki ho fihrist jari jo 'dilbar'

to ab ke shah-e-taghazzul ko bhi bulaya jae