chalo ki hum bhi zamane ke sath chalte hain

chalo ki ham bhī zamāne ke saath chalte haiñ

nahīñ badaltā zamāna to ham badalte haiñ

kisī ko qadr nahīñ hai hamārī qadroñ kī

chalo ki aaj ye qadreñ sabhī badalte haiñ

bulā rahī haiñ hameñ talḳhiyāñ haqīqat kī

ḳhayāl-o-ḳhvāb kī duniyā se ab nikalte haiñ

bujhī hai aag kabhī peT kī usūloñ se

ye un se pūchhiye jo gardishoñ meñ palte haiñ

unheñ na toliye tahzīb ke tarāzū meñ

gharoñ meñ jin ke na chūlhe na diip jalte haiñ

zarā sī aas bhī tā'bīr kī nahīñ jin ko

diloñ meñ ḳhvāb vo kyā soch kar machalte haiñ

hameñ na raas zamāne kī mahfileñ aa.ī

chalo ki chhoḌ ke ab is jahāñ ko chalte haiñ

mizāj tere ġhamoñ kā 'sadā' nirālā hai

kabhī ġhazal to kabhī giit ban ke Dhalte haiñ

chalo ki hum bhi zamane ke sath chalte hain

nahin badalta zamana to hum badalte hain

kisi ko qadr nahin hai hamari qadron ki

chalo ki aaj ye qadren sabhi badalte hain

bula rahi hain hamein talKHiyan haqiqat ki

KHayal-o-KHwab ki duniya se ab nikalte hain

bujhi hai aag kabhi peT ki usulon se

ye un se puchhiye jo gardishon mein palte hain

unhen na toliye tahzib ke taraazu mein

gharon mein jin ke na chulhe na dip jalte hain

zara si aas bhi ta'bir ki nahin jin ko

dilon mein KHwab wo kya soch kar machalte hain

hamein na ras zamane ki mahfilen aai

chalo ki chhoD ke ab is jahan ko chalte hain

mizaj tere ghamon ka 'sada' nirala hai

kabhi ghazal to kabhi git ban ke Dhalte hain