chalo tum bhi muqaddar aazma lo

chalo tum bhī muqaddar aazmā lo

hamāre naam kā sikka uchhālo

maiñ apne aap meñ dhañsne lagī huuñ

mujhe merī hī daldal se nikālo

guhar kam haiñ ḳhazaf-reze ziyāda

abhī kuchh aur dariyā ko khañgālo

chalo karte haiñ tajdīd-e-ta.alluq

purānī ranjishoñ par ḳhaak Daalo

mirā maazī mire dar par khaḌā hai

mujhe tum apne dāman meñ chhupā lo

bahut mushkil ghaḌī aa.ī huī hai

ghaḌī kī suuī ko aa kar sambhālo

tumhāre saath jiinā chāhtī huuñ

mujhe be-maut marne se bachā lo

bujhā sakte nahīñ ho aag jab tum

kam-az-kam aag meñ ghī to na Daalo

ta.assub kā dhuāñ dam ghoTtā hai

kahāñ mar-khap ga.e raushan ḳhayālo

tavajjoh chāhiye tum ko jo 'raḳhshāñ'

kabhī tum bhī kisī ko ghaas Daalo

chalo tum bhi muqaddar aazma lo

hamare nam ka sikka uchhaalo

main apne aap mein dhansne lagi hun

mujhe meri hi daldal se nikalo

guhar kam hain KHazaf-reze ziyaada

abhi kuchh aur dariya ko khangalo

chalo karte hain tajdid-e-talluq

purani ranjishon par KHak Dalo

mera mazi mere dar par khaDa hai

mujhe tum apne daman mein chhupa lo

bahut mushkil ghaDi aai hui hai

ghaDi ki sui ko aa kar sambhaalo

tumhaare sath jina chahti hun

mujhe be-maut marne se bacha lo

bujha sakte nahin ho aag jab tum

kam-az-kam aag mein ghi to na Dalo

tassub ka dhuan dam ghoTta hai

kahan mar-khap gae raushan KHayalo

tawajjoh chahiye tum ko jo 'raKHshan'

kabhi tum bhi kisi ko ghas Dalo