chalo ye bhi apna hi jurm hai ye gunah bhi mere sar gae

chalo ye bhī apnā hī jurm hai ye gunāh bhī mire sar ga.e

maiñ na chal sakā to Thahar gayā vo guzar sake to guzar ga.e

vahī sā.ateñ haiñ faroġh-e-jāñ mirī rāh-e-shauq meñ aaj bhī

mirī manziloñ ke nasīb jab tire naqsh-e-pā se sañvar ga.e

vahī marhale mirī yaad haiñ vahī mashġhale mirā ḳhvāb haiñ

shab-o-roz jab tire gesuoñ tire ārizoñ meñ Thahar ga.e

vo nadī kā sāhil-e-dilrubā hameñ yaad sab hai zarā zarā

tire ruḳh pe jab mirī ik talab pe shafaq ke rang bikhar ga.e

maiñ jo chup rahā to ye baat thī ki kisī kā raaz na khul sake

maiñ jo ro paḌā to ye raaz thā ki mirī vafā se vo Dar ga.e

maiñ kahāñ huuñ sāġhar-e-mai kahāñ shab-e-māh kyoñ hai dhuāñ dhuāñ

ye batā ḳhumār-e-sahar-gahī mire aql-o-hosh kidhar ga.e

chalo ye bhi apna hi jurm hai ye gunah bhi mere sar gae

main na chal saka to Thahar gaya wo guzar sake to guzar gae

wahi saaten hain farogh-e-jaan meri rah-e-shauq mein aaj bhi

meri manzilon ke nasib jab tere naqsh-e-pa se sanwar gae

wahi marhale meri yaad hain wahi mashghale mera KHwab hain

shab-o-roz jab tere gesuon tere aarizon mein Thahar gae

wo nadi ka sahil-e-dilruba hamein yaad sab hai zara zara

tere ruKH pe jab meri ek talab pe shafaq ke rang bikhar gae

main jo chup raha to ye baat thi ki kisi ka raaz na khul sake

main jo ro paDa to ye raaz tha ki meri wafa se wo Dar gae

main kahan hun saghar-e-mai kahan shab-e-mah kyon hai dhuan dhuan

ye bata KHumar-e-sahar-gahi mere aql-o-hosh kidhar gae