chalo ye sach hi sahi hoga na-gahan guzre

chalo ye sach hī sahī hogā nā-gahāñ guzre

hamāre dar se magar aap mehrbāñ guzre

jidhar bhī aap ga.e bas ga.e haiñ vīrāne

ujaḌ ga.e haiñ chaman ham jahāñ jahāñ guzre

hameñ miTāne kī gar koshisheñ tamām huiiñ

to ye bhī kahiye ki ham kitne saḳht-jāñ guzre

vo sub.h-o-shām kī rañgīniyāñ tamām huiiñ

sa.ūbatoñ kī kaḌī dhuup hai jahāñ guzre

vo apne dāman-e-pāra pe bhī nigāh kare

jahāñ meñ mujh pe uThā kar jo uñgliyāñ guzre

hayāt-o-maut kā hal kar chuke haiñ har uqda

ab ham ko ḳhauf nahīñ laakh imtihāñ guzre

'anīs' aap ko dekhā hai har ghaḌī masrūf

kabhī to chain se do-chār din miyāñ guzre

chalo ye sach hi sahi hoga na-gahan guzre

hamare dar se magar aap mehrban guzre

jidhar bhi aap gae bas gae hain virane

ujaD gae hain chaman hum jahan jahan guzre

hamein miTane ki gar koshishen tamam huin

to ye bhi kahiye ki hum kitne saKHt-jaan guzre

wo subh-o-sham ki ranginiyan tamam huin

saubaton ki kaDi dhup hai jahan guzre

wo apne daman-e-para pe bhi nigah kare

jahan mein mujh pe uTha kar jo ungliyan guzre

hayat-o-maut ka hal kar chuke hain har uqda

ab hum ko KHauf nahin lakh imtihan guzre

'anis' aap ko dekha hai har ghaDi masruf

kabhi to chain se do-chaar din miyan guzre