chalta hai aaftab ka daur us qamar ke sath

chaltā hai āftāb kā daur us qamar ke saath

ham aib bhī jo karte haiñ to ik hunar ke saath

kyūñkar kisī ke roz-e-jazā chhup sakeñge jurm

ḳhufya-navīs do-do haiñ har ik bashar ke saath

rakh lenā yā ḳhudā mirī tar-dāmanī kī sharm

bādal baraste aa.eñ duā ke asar ke saath

in rozoñ ḳhāndāñ ko koī pūchhtā nahīñ

izzat hai aadmī kī bas ab sīm-o-zar ke saath

hāthoñ meñ chāhte ho hinā kā jo shoḳh-rang

mehñdī ko piis lo mire zaḳhm-e-jigar ke saath

baaqī ḳhumār raat kā ab tak hai sāqiyā

gardish meñ jaam bhī rahe daurān-e-sar ke saath

fazl-e-ḳhudā kā dekhnā vaa.iz ki roz-e-hashr

jannat meñ ham bhī jā.eñge ḳhairul-bashar ke saath

ḳhat de ke nāma-bar ko ye kahtā hai shauq-e-dil

achchhā to hai ki ḳhud bhī chalūñ nāma-bar ke saath

bachnā dil-o-jigar kā butoñ se muhāl hai

tīr-e-mizha bhī chalte haiñ teġh-e-nazar ke saath

afsos ab kisī kā koī qadr-dāñ nahīñ

jauhar-shanās uTh ga.e ahl-e-hunar ke saath

karte na ham kisī kī itā.at kabhī 'diler'

māshūq ham ko milte agar zor-o-zar ke saath

chalta hai aaftab ka daur us qamar ke sath

hum aib bhi jo karte hain to ek hunar ke sath

kyunkar kisi ke roz-e-jaza chhup sakenge jurm

KHufya-nawis do-do hain har ek bashar ke sath

rakh lena ya KHuda meri tar-damani ki sharm

baadal baraste aaen dua ke asar ke sath

in rozon KHandan ko koi puchhta nahin

izzat hai aadmi ki bas ab sim-o-zar ke sath

hathon mein chahte ho hina ka jo shoKH-rang

mehndi ko pis lo mere zaKHm-e-jigar ke sath

baqi KHumar raat ka ab tak hai saqiya

gardish mein jam bhi rahe dauran-e-sar ke sath

fazl-e-KHuda ka dekhna waiz ki roz-e-hashr

jannat mein hum bhi jaenge KHairul-bashar ke sath

KHat de ke nama-bar ko ye kahta hai shauq-e-dil

achchha to hai ki KHud bhi chalun nama-bar ke sath

bachna dil-o-jigar ka buton se muhaal hai

tir-e-mizha bhi chalte hain tegh-e-nazar ke sath

afsos ab kisi ka koi qadr-dan nahin

jauhar-shanas uTh gae ahl-e-hunar ke sath

karte na hum kisi ki itaat kabhi 'diler'

mashuq hum ko milte agar zor-o-zar ke sath