chalte chalte rah mein aisa bhi kar jate hain hum

chalte chalte raah meñ aisā bhī kar jaate haiñ ham

manzil-e-maqsūd se aage guzar jaate haiñ ham

yakjā kar paatā hai vo ham ko ka.ī ghanToñ ke ba.ad

lams se us ke jo pal bhar meñ bikhar jaate haiñ ham

ek jumla hī qazā kā apnī baa.is ban gayā

lab pe bas zer-o-zabar aate hī mar jaate haiñ ham

ḳhūbsūrat is liye lagtī hai tasvīr-e-ġhazal

muḳhtalif lahjoñ se is meñ rang bhar jaate haiñ ham

dil sadā detā hai jab āvārgī āvārgī

jā ke phir us ke mahalle meñ Thahar jaate haiñ ham

rahguzar se vo miTā detā hai qadmoñ ke nishāñ

manziloñ pe naqsh-e-pā ban kar ubhar jaate haiñ ham

ek chārāgar to aisā bhī hai 'dilbar' shahr meñ

jis ke hāthoñ kī davā khāte hī mar jaate haiñ ham

chalte chalte rah mein aisa bhi kar jate hain hum

manzil-e-maqsud se aage guzar jate hain hum

yakja kar pata hai wo hum ko kai ghanTon ke baad

lams se us ke jo pal bhar mein bikhar jate hain hum

ek jumla hi qaza ka apni bais ban gaya

lab pe bas zer-o-zabar aate hi mar jate hain hum

KHubsurat is liye lagti hai taswir-e-ghazal

muKHtalif lahjon se is mein rang bhar jate hain hum

dil sada deta hai jab aawargi aawargi

ja ke phir us ke mahalle mein Thahar jate hain hum

rahguzar se wo miTa deta hai qadmon ke nishan

manzilon pe naqsh-e-pa ban kar ubhar jate hain hum

ek chaaragar to aisa bhi hai 'dilbar' shahr mein

jis ke hathon ki dawa khate hi mar jate hain hum