chalte hain ki ab sabr bhi itna nahin rakhte

chalte haiñ ki ab sabr bhī itnā nahīñ rakhte

ik aur na.e dukh kā irāda nahīñ rakhte

bas ret sī uḌtī hai ab us rāhguzar par

jo peḌ bhī milte haiñ vo saaya nahīñ karte

kis taur se āḳhir unheñ tasvīr kareñ ham

jo ḳhvāb azal se koī chehra nahīñ rakhte

ik baar bichhaḌ jaa.eñ to DhūñDhe na mileñge

ham rah meñ kahīñ naqsh-e-kaf-e-pā nahīñ rakhte

phir sulh bhī tum bin to kahāñ honī thī ḳhud se

so rabt bhī ab ḳhud se ziyāda nahīñ rakhte

us moḌ pe rūThe ho tum ai dost ki jis par

dushman bhī koī rañj purānā nahīñ rakhte

kyā soch ke zinda haiñ tire dasht meñ ye log

āñkhoñ meñ jo ik ḳhvāb kā TukḌā nahīñ rakhte

chalte hain ki ab sabr bhi itna nahin rakhte

ek aur nae dukh ka irada nahin rakhte

bas ret si uDti hai ab us rahguzar par

jo peD bhi milte hain wo saya nahin karte

kis taur se aaKHir unhen taswir karen hum

jo KHwab azal se koi chehra nahin rakhte

ek bar bichhaD jaen to DhunDhe na milenge

hum rah mein kahin naqsh-e-kaf-e-pa nahin rakhte

phir sulh bhi tum bin to kahan honi thi KHud se

so rabt bhi ab KHud se ziyaada nahin rakhte

us moD pe ruThe ho tum ai dost ki jis par

dushman bhi koi ranj purana nahin rakhte

kya soch ke zinda hain tere dasht mein ye log

aankhon mein jo ek KHwab ka TukDa nahin rakhte