chalte phirte raston mein kho gae ahbab sab

chalte phirte rāstoñ meñ kho ga.e ahbāb sab

bas ga.e kis des jā kar ai dil-e-betāb sab

tund maujoñ se jo uljhe the hue sāhil nasīb

kashtiyoñ meñ baiThne vaale hue ġharqāb sab

chand gandī machhliyoñ ne sab ko rusvā kar diyā

machhliyoñ ke naam se Darne lage tālāb sab

vo añdheroñ kā pujārī chāhtā hai aur kyā

band karne par tulā hai raushnī ke baab sab

saare sajde be-harārat sab duā.eñ nā-rasā

kaise be-raunaq hue haiñ mimbar-o-mehrāb sab

un ke hoñToñ par tabassum un kī āñkhoñ meñ jalāl

chāhne vaale misāl-e-māhī-e-be-āb sab

niyyatoñ par munhasir hai zindagī kī haar jiit

yuuñ to kahne ko mayassar haiñ hameñ asbāb sab

rauñdte haiñ chāñd kā siina mashīnoñ ke qadam

reza-reza ho ga.e rūmān-parvar ḳhvāb sab

taaki pattoñ kā jaḌoñ se silsila daa.im rahe

siikh le ai nasl-e-nau aslāf ke ādāb sab

chalte phirte raston mein kho gae ahbab sab

bas gae kis des ja kar ai dil-e-betab sab

tund maujon se jo uljhe the hue sahil nasib

kashtiyon mein baiThne wale hue gharqab sab

chand gandi machhliyon ne sab ko ruswa kar diya

machhliyon ke nam se Darne lage talab sab

wo andheron ka pujari chahta hai aur kya

band karne par tula hai raushni ke bab sab

sare sajde be-hararat sab duaen na-rasa

kaise be-raunaq hue hain mimbar-o-mehrab sab

un ke honTon par tabassum un ki aankhon mein jalal

chahne wale misal-e-mahi-e-be-ab sab

niyyaton par munhasir hai zindagi ki haar jit

yun to kahne ko mayassar hain hamein asbab sab

raundte hain chand ka sina mashinon ke qadam

reza-reza ho gae ruman-parwar KHwab sab

taki patton ka jaDon se silsila daim rahe

sikh le ai nasl-e-nau aslaf ke aadab sab