chalti rahi us kuche mein talwar hamesha

chaltī rahī us kūche meñ talvār hamesha

lāshe hī nikalte rahe do-chār hamesha

gil khulte raheñ chahchahe kartā rahe bulbul

yā-rab rahe ābād ye gulzār hamesha

ham riñd hue shāhid-e-maqsūd se vāsil

jhagḌe meñ rahe kāfir o dīñ-dār hamesha

yaañ tuḳhm-e-tamannā se ugā kartā hai laala

gul khāte haiñ har fasl meñ do-chār hamesha

taḌpā kareñ kūche meñ tire saikḌoñ kushte

rañgīñ rahe ḳhuuñ se tirī talvār hamesha

dīvāne haiñ maa.il hoñ agar hūr-o-parī ke

jo dekh rahe huuñ tirā dīdār hamesha

mujh tishna-e-dīdār ko kis roz chhakāyā

pyāsā hī rahā ḳhuuñ kā vo ḳhuñḳhār hamesha

mushtāqoñ ne tere na liyā kauḌiyoñ ke mol

biktā rahā yūsuf sar-e-bāzār hamesha

hai zulf-e-musalsal tirī yā dām-e-balā hai

ho rahte haiñ do-chār giraftār hamesha

kyūñ-kar tū masīhā huā mash.hūr jahāñ meñ

marte haiñ tire haath se bīmār hamesha

hañgāme na.e roz huā karte haiñ barpā

fitne hī uThātī hai vo raftār hamesha

ai 'rind' junūñ meñ bhī na sahrā ko ga.e ham

khāyā kiye patthar sar-e-bāzār hamesha

chalti rahi us kuche mein talwar hamesha

lashe hi nikalte rahe do-chaar hamesha

gil khulte rahen chahchahe karta rahe bulbul

ya-rab rahe aabaad ye gulzar hamesha

hum rind hue shahid-e-maqsud se wasil

jhagDe mein rahe kafir o din-dar hamesha

yan tuKHm-e-tamanna se uga karta hai lala

gul khate hain har fasl mein do-chaar hamesha

taDpa karen kuche mein tere saikDon kushte

rangin rahe KHun se teri talwar hamesha

diwane hain mail hon agar hur-o-pari ke

jo dekh rahe hun tera didar hamesha

mujh tishna-e-didar ko kis roz chhakaya

pyasa hi raha KHun ka wo KHunKHar hamesha

mushtaqon ne tere na liya kauDiyon ke mol

bikta raha yusuf sar-e-bazar hamesha

hai zulf-e-musalsal teri ya dam-e-bala hai

ho rahte hain do-chaar giraftar hamesha

kyun-kar tu masiha hua mashhur jahan mein

marte hain tere hath se bimar hamesha

hangame nae roz hua karte hain barpa

fitne hi uThati hai wo raftar hamesha

ai 'rind' junun mein bhi na sahra ko gae hum

khaya kiye patthar sar-e-bazar hamesha