chamak chehre ki honTon ki hansi dekhi nahin jati

chamak chehre kī hoñToñ kī hañsī dekhī nahīñ jaatī

sitamgar se mirī zinda-dilī dekhī nahīñ jaatī

guloñ se kah rahī haiñ titliyāñ mat ḳhanda-zan honā

ki ham se bāġhbāñ kī be-ruḳhī dekhī nahīñ jaatī

hameñ āñkheñ milī haiñ shā.iroñ jaisī ki ham se to

kisī dushman kī kashtī Dūbtī dekhī nahīñ jaatī

nadī ḳhud ḳhushk ho jaatī hai donoñ ko milāne meñ

nadī se sāhiloñ kī bebasī dekhī nahīñ jaatī

ḳhazāna aab kā ye ābshāreñ kyoñ luTātī haiñ

ki in se koī bhī sūkhī nadī dekhī nahīñ jaatī

vahī bas chāñd sūraj se bahut nārāz rahtī haiñ

ki jin āñkhoñ se un kī raushnī dekhī nahīñ jaatī

vo ambar hai maiñ panchhī huuñ vo gul hai to maiñ bulbul huuñ

kahīñ bhī is tarah kī dostī dekhī nahīñ jaatī

chamak chehre ki honTon ki hansi dekhi nahin jati

sitamgar se meri zinda-dili dekhi nahin jati

gulon se kah rahi hain titliyan mat KHanda-zan hona

ki hum se baghban ki be-ruKHi dekhi nahin jati

hamein aankhen mili hain shairon jaisi ki hum se to

kisi dushman ki kashti Dubti dekhi nahin jati

nadi KHud KHushk ho jati hai donon ko milane mein

nadi se sahilon ki bebasi dekhi nahin jati

KHazana aab ka ye aabshaaren kyon luTati hain

ki in se koi bhi sukhi nadi dekhi nahin jati

wahi bas chand suraj se bahut naraaz rahti hain

ki jin aankhon se un ki raushni dekhi nahin jati

wo ambar hai main panchhi hun wo gul hai to main bulbul hun

kahin bhi is tarah ki dosti dekhi nahin jati