چمک چہرے کی ہونٹوں کی ہنسی دیکھی نہیں جاتی

چمک چہرے کی ہونٹوں کی ہنسی دیکھی نہیں جاتی

ستم گر سے مری زندہ دلی دیکھی نہیں جاتی

گلوں سے کہہ رہی ہیں تتلیاں مت خندہ زن ہونا

کہ ہم سے باغباں کی بے رخی دیکھی نہیں جاتی

ہمیں آنکھیں ملی ہیں شاعروں جیسی کہ ہم سے تو

کسی دشمن کی کشتی ڈوبتی دیکھی نہیں جاتی

ندی خود خشک ہو جاتی ہے دونوں کو ملانے میں

ندی سے ساحلوں کی بے بسی دیکھی نہیں جاتی

خزانہ آب کا یہ آبشاریں کیوں لٹاتی ہیں

کہ ان سے کوئی بھی سوکھی ندی دیکھی نہیں جاتی

وہی بس چاند سورج سے بہت ناراض رہتی ہیں

کہ جن آنکھوں سے ان کی روشنی دیکھی نہیں جاتی

وہ امبر ہے میں پنچھی ہوں وہ گل ہے تو میں بلبل ہوں

کہیں بھی اس طرح کی دوستی دیکھی نہیں جاتی