چمکتے تاروں پہ تیرا ہی نام لکھتے ہیں

چمکتے تاروں پہ تیرا ہی نام لکھتے ہیں

سنہرے لفظوں میں تجھ کو پیام لکھتے ہیں

ترے دیار پہ جب رک گئے ہیں میرے قدم

ترے ہی در پہ تو اب ہم سلام لکھتے ہیں

سلگتے شعلے تو ہوتے ہی ہیں جلانے کو

جو جل چکے ہیں وہ زخمی عوام لکھتے ہیں

یہ کیسے کیسوں کو ہم نے بنایا راہنما

حلال چیز کو جو اب حرام لکھتے ہیں

بہت غریب ہیں بھوکے ہیں احتجاجاً ہم

بیاض وقت پہ یہ صبح و شام لکھتے ہیں

انہیں خبر نہیں ساحرؔ ہم آج ہیں آزاد

جو اپنے آپ کو اب بھی غلام لکھتے ہیں