chamakti hui dhup tezi se nikli

chamaktī huī dhuup tezī se niklī

guzartī huī bārishoñ ko bulāne

havāoñ ne zid kī ki ham bhī chaleñge

lagīñ ThanDakeñ apne paikar sajāne

milī thī ḳhabar mausamoñ ko kahīñ se

kisī kunj-e-gulshan meñ haiñ do divāne

vo barsoñ ke baa'd aaj yakjā hue haiñ

jo biitī hai ik dūsre ko sunāne

daraḳhtoñ ne jhuk jhuk ke tā'zīm baḳhshī

baḌhe sabza-o-gul bhī āñkheñ bichhāne

kabhī un ke chehroñ ko bārish ne chūmā

kabhī un kā dāman basāyā sabā ne

kabhī un kī āñkhoñ meñ sūraj ne jhāñkā

kabhī Daal dī un pe chādar ghaTā ne

chamakti hui dhup tezi se nikli

guzarti hui barishon ko bulane

hawaon ne zid ki ki hum bhi chalenge

lagin ThanDaken apne paikar sajaane

mili thi KHabar mausamon ko kahin se

kisi kunj-e-gulshan mein hain do diwane

wo barson ke ba'd aaj yakja hue hain

jo biti hai ek dusre ko sunane

daraKHton ne jhuk jhuk ke ta'zim baKHshi

baDhe sabza-o-gul bhi aankhen bichhane

kabhi un ke chehron ko barish ne chuma

kabhi un ka daman basaya saba ne

kabhi un ki aankhon mein suraj ne jhanka

kabhi Dal di un pe chadar ghaTa ne