chaman apne rang mein mast hai koi gham-gusar-e-digar nahin

chaman apne rañg meñ mast hai koī ġham-gusār-e-digar nahīñ

ki hai shabnam ashk-fishāñ magar gul-e-tar ko koī ḳhabar nahīñ

ġham-e-zindagī kā ilaaj to kabhī maut se bhī na ho sakā

ye vo saḳht qaid-e-hayāt hai kisī tarah jis se mafar nahīñ

mire paas jo bhī thā luT gayā na vo maiñ rahā na vo dil rahā

kisī aur shai kā to zikr kyā ki ab aah meñ bhī asar nahīñ

ye tasavvurāt kī vus.ateñ ye taḳhaiyyulāt kī rif.ateñ

vahāñ jalve dekh rahā huuñ maiñ jahāñ iḳhtiyār-e-nazar nahīñ

tire husn kā ye kamāl hai ki ḳhud aap apnī misāl hai

vo jamāl hī to jamāl hai jo kisī kā aks-e-nazar nahīñ

jo haiñ be-amal vo haiñ bā-amal jo haiñ be-hunar vo haiñ bā-hunar

ajab inqilāb-e-zamāna hai kahīñ qadr-e-ahl-e-hunar nahīñ

mujhe ai 'figār' na mil sakā koī lamha sub.h-e-nashāt kā

mirī zindagī hai vo shām-e-ġham ki jo rūshanās-e-sahar nahīñ

chaman apne rang mein mast hai koi gham-gusar-e-digar nahin

ki hai shabnam ashk-fishan magar gul-e-tar ko koi KHabar nahin

gham-e-zindagi ka ilaj to kabhi maut se bhi na ho saka

ye wo saKHt qaid-e-hayat hai kisi tarah jis se mafar nahin

mere pas jo bhi tha luT gaya na wo main raha na wo dil raha

kisi aur shai ka to zikr kya ki ab aah mein bhi asar nahin

ye tasawwuraat ki wusaten ye taKHaiyyulat ki rifaten

wahan jalwe dekh raha hun main jahan iKHtiyar-e-nazar nahin

tere husn ka ye kamal hai ki KHud aap apni misal hai

wo jamal hi to jamal hai jo kisi ka aks-e-nazar nahin

jo hain be-amal wo hain ba-amal jo hain be-hunar wo hain ba-hunar

ajab inqilab-e-zamana hai kahin qadr-e-ahl-e-hunar nahin

mujhe ai 'figar' na mil saka koi lamha subh-e-nashat ka

meri zindagi hai wo sham-e-gham ki jo rushanas-e-sahar nahin