chaman chaman hi nahin hai jo lala-zar nahin

chaman chaman hī nahīñ hai jo lāla-zār nahīñ

ham us ko dil nahīñ kahte jo dāġh-dār nahīñ

maiñ chal rahā huuñ zamāne ke saath saath magar

fazā zamāne kī phir bhī to sāzgār nahīñ

raqīb jhuuT kahegā to sach samajh loge

kaheñge sach bhī agar ham to e'tibār nahīñ

maiñ un ke husn ko ilzām dene vaalā kaun

jab apne dil pe mujhe ḳhud hī iḳhtiyār nahīñ

ab aur dekhiye tauhīn-e-ishq kyā hogī

vo kah rahe haiñ hameñ terā e'tibār nahīñ

tumhāre hijr meñ din kis qadar guzāre haiñ

koī hisāb nahīñ hai koī shumār nahīñ

tire karam ke bharose pe mutma.in huuñ maiñ

ye jāntā huuñ ki mujh sā gunāhgār nahīñ

kisī ke ruḳh pe nazar jam ke rah ga.ī shāyad

mirī nigāh meñ rañgīnī-e-bahār nahīñ

ḳhumār-e-nashā-e-hastī hai vo balā 'shañkar'

bahak rahā hai har ik koī hoshiyār nahīñ

chaman chaman hi nahin hai jo lala-zar nahin

hum us ko dil nahin kahte jo dagh-dar nahin

main chal raha hun zamane ke sath sath magar

faza zamane ki phir bhi to sazgar nahin

raqib jhuT kahega to sach samajh loge

kahenge sach bhi agar hum to e'tibar nahin

main un ke husn ko ilzam dene wala kaun

jab apne dil pe mujhe KHud hi iKHtiyar nahin

ab aur dekhiye tauhin-e-ishq kya hogi

wo kah rahe hain hamein tera e'tibar nahin

tumhaare hijr mein din kis qadar guzare hain

koi hisab nahin hai koi shumar nahin

tere karam ke bharose pe mutmain hun main

ye jaanta hun ki mujh sa gunahgar nahin

kisi ke ruKH pe nazar jam ke rah gai shayad

meri nigah mein rangini-e-bahaar nahin

KHumar-e-nasha-e-hasti hai wo bala 'shankar'

bahak raha hai har ek koi hoshiyar nahin