chaman chaman se gulon ka yahi payam aaya

chaman chaman se guloñ kā yahī payām aayā

vahī hasīñ hai jo duniyā meñ shād-kām aayā

mirī taraf ko uThī yuuñ nigāh saaqī kī

ki jaise daur meñ labrez mai kā jaam aayā

ḳhud un ke ruḳh se huā un ke dil kā haal ayaañ

jo bhūle-bisre kabhī lab pe merā naam aayā

baḌhā ke haath zamāne ne us se chhīn liyā

jo ek lahja bhī lab tak kisī ke jaam aayā

sadā-e-pīr-e-muġhāñ thī ye bazm-e-rindāñ meñ

hai is kā mai-kadā qabze meñ jis ke jaam aayā

harīm-e-nāz se aa to gayā huuñ maiñ lekin

pukārtā huā koī har ek gaam aayā

maiñ gum hī thā abhī tārīkiyoñ meñ maazī kī

ki sub.h-e-nau kī kiran kā mujhe salām aayā

ḳhayāl-e-yār kī mad-hoshiyāñ ma.āz-allāh

mirī nazar na uThī jab vo sū-e-bām aayā

ḳhirad kī saarī ga.ī puḳhta-kāriyāñ be-kār

bas ek shauq kā saudā-e-ḳhām kaam aayā

'habīb' dād-e-suḳhan mil ga.ī mujhe us roz

pasand-e-tab.a jab un ko mirā kalām aayā

chaman chaman se gulon ka yahi payam aaya

wahi hasin hai jo duniya mein shad-kaam aaya

meri taraf ko uThi yun nigah saqi ki

ki jaise daur mein labrez mai ka jam aaya

KHud un ke ruKH se hua un ke dil ka haal ayan

jo bhule-bisre kabhi lab pe mera nam aaya

baDha ke hath zamane ne us se chhin liya

jo ek lahja bhi lab tak kisi ke jam aaya

sada-e-pir-e-mughan thi ye bazm-e-rindan mein

hai is ka mai-kada qabze mein jis ke jam aaya

harim-e-naz se aa to gaya hun main lekin

pukarta hua koi har ek gam aaya

main gum hi tha abhi tarikiyon mein mazi ki

ki subh-e-nau ki kiran ka mujhe salam aaya

KHayal-e-yar ki mad-hoshiyan maaz-allah

meri nazar na uThi jab wo su-e-baam aaya

KHirad ki sari gai puKHta-kariyan be-kar

bas ek shauq ka sauda-e-KHam kaam aaya

'habib' dad-e-suKHan mil gai mujhe us roz

pasand-e-taba jab un ko mera kalam aaya