chaman ka haal sunao ki raat kaT jae

chaman kā haal sunāo ki raat kaT jaa.e

tamām raat rulāo ki raat kaT jaa.e

junūn o 'aql shanāsā darīda-dil logo

kuchh apnī apnī sunāo ki raat kaT jaa.e

taras ga.ī haiñ nigāheñ kiran kiran ke liye

koī sahar ko batāo ki raat kaT jaa.e

bichhaḌne vāloñ kī vo boltī huī āñkheñ

mujhe na yaad dilāo ki raat kaT jaa.e

añdherā raat kā jaane ho ḳhatm kab 'uzma'

sahar kā ḳhvāb dikhāo ki raat kaT jaa.e

chaman ka haal sunao ki raat kaT jae

tamam raat rulao ki raat kaT jae

junun o 'aql shanasa darida-dil logo

kuchh apni apni sunao ki raat kaT jae

taras gai hain nigahen kiran kiran ke liye

koi sahar ko batao ki raat kaT jae

bichhaDne walon ki wo bolti hui aankhen

mujhe na yaad dilao ki raat kaT jae

andhera raat ka jaane ho KHatm kab 'uzma'

sahar ka KHwab dikhao ki raat kaT jae