chaman ka zikr hi kya husn-e-la-zawal ke baad

chaman kā zikr hī kyā husn-e-lā-zavāl ke baad

ḳhayāl-e-ḳhuld kareñ kyā tire ḳhayāl ke baad

ḳhabar nahīñ mujhe kyā un ke qalb par guzrī

ki sharmsār huā huuñ maiñ arz-e-hāl ke baad

na chhoḌ gardish-e-daurāñ ab ek aalam par

koī to haal ho merā shikasta-hāl ke baad

kuchh aur ho na sakī un se guftugū aage

ki aa ga.e the vo sakte meñ ik savāl ke baad

nigāh-o-dil kā hamāre bhī hai vahī aalam

huā jo tuur pe nazzāra-e-jamāl ke baad

haiñ aks-e-pā-e-nigārāñ pe sajda-hā-e-mudām

uThā hī karte haiñ dast-e-duā hilāl ke baad

vo aaj sarhad-e-lafz-o-bayāñ se bāhar hai

'nishā' mujhe jo masarrat huī malāl ke baad

chaman ka zikr hi kya husn-e-la-zawal ke baad

KHayal-e-KHuld karen kya tere KHayal ke baad

KHabar nahin mujhe kya un ke qalb par guzri

ki sharmsar hua hun main arz-e-haal ke baad

na chhoD gardish-e-dauran ab ek aalam par

koi to haal ho mera shikasta-haal ke baad

kuchh aur ho na saki un se guftugu aage

ki aa gae the wo sakte mein ek sawal ke baad

nigah-o-dil ka hamare bhi hai wahi aalam

hua jo tur pe nazzara-e-jamal ke baad

hain aks-e-pa-e-nigaran pe sajda-ha-e-mudam

uTha hi karte hain dast-e-dua hilal ke baad

wo aaj sarhad-e-lafz-o-bayan se bahar hai

'nisha' mujhe jo masarrat hui malal ke baad