chaman ko Khaar-o-KHas-e-ashiyan se aar na ho

chaman ko ḳhār-o-ḳhas-e-āshiyāñ se aar na ho

kahīñ guzishta bahāroñ kī yādgār na ho

chamak rahā hai añdhere meñ kārobār-e-hayāt

nazar nazar ho to jiinā bhī sāzgār na ho

ye zulf-o-ruḳh ye shab-o-roz ye bahār-o-ḳhizāñ

vo silsila hai ki qat-e-nazar bhī baar na ho

bahār kuchh jo milī rañg-o-bū se begāna

vo aa ga.e ki anāsir meñ intishār na ho

ye tār-o-pūd nizām-e-ḳhirad bikhar ke rahe

junūñ ba-qadr-e-tajallī jo hoshiyār na ho

ye Dar rahā huuñ maiñ takrār-e-mausam-e-gul se

miTā huā koī aalam phir āshkār na ho

ye aarzū hai ki ḳhush-fahmī-e-talab hai 'nushūr'

umiid kyā hai jo duniyā umīd-vār na ho

chaman ko KHar-o-KHas-e-ashiyan se aar na ho

kahin guzishta bahaaron ki yaadgar na ho

chamak raha hai andhere mein karobar-e-hayat

nazar nazar ho to jina bhi sazgar na ho

ye zulf-o-ruKH ye shab-o-roz ye bahaar-o-KHizan

wo silsila hai ki qat-e-nazar bhi bar na ho

bahaar kuchh jo mili rang-o-bu se begana

wo aa gae ki anasir mein intishaar na ho

ye tar-o-pud nizam-e-KHirad bikhar ke rahe

junun ba-qadr-e-tajalli jo hoshiyar na ho

ye Dar raha hun main takrar-e-mausam-e-gul se

miTa hua koi aalam phir aashkar na ho

ye aarzu hai ki KHush-fahmi-e-talab hai 'nushur'

umid kya hai jo duniya umid-war na ho