chaman ko rang saba tazgi bahaar mile

chaman ko rang sabā tāzgī bahār mile

tumhāre husn se har chiiz ko nikhār mile

badal ga.ī hai zamāne kī aisī āb-o-havā

ki ab to jis ko bhī dekhūñ vo ashk-bār mile

ye aarzū hai nazar pher kar guzar jā.ūñ

vo merā dushman-e-jāñ phir jo ek baar mile

ye apnā apnā muqaddar hai kis ne kyā paayā

kisī ko phuul kisī ko chaman se ḳhaar mile

'ajīb vaqt kī āñdhī chalī jo hosh aayā

to dil pe chhā.e hue saiñkaḌoñ ġhubār mile

ye dekhne ke liye baar baar lauTtī huuñ

ki kaash tū mire jaane pe sogvār mile

maiñ aise shaḳhs ko kyā naam duuñ 'humairā' jise

maiñ jitnī baar bhī dekhūñ mujhe qarār mile

chaman ko rang saba tazgi bahaar mile

tumhaare husn se har chiz ko nikhaar mile

badal gai hai zamane ki aisi aab-o-hawa

ki ab to jis ko bhi dekhun wo ashk-bar mile

ye aarzu hai nazar pher kar guzar jaun

wo mera dushman-e-jaan phir jo ek bar mile

ye apna apna muqaddar hai kis ne kya paya

kisi ko phul kisi ko chaman se KHar mile

'ajib waqt ki aandhi chali jo hosh aaya

to dil pe chhae hue sainkaDon ghubar mile

ye dekhne ke liye bar bar lauTti hun

ki kash tu mere jaane pe sogwar mile

main aise shaKHs ko kya nam dun 'humaira' jise

main jitni bar bhi dekhun mujhe qarar mile