chaman lahak ke rah gaya ghaTa machal ke rah gai

chaman lahak ke rah gayā ghaTā machal ke rah ga.ī

tire baġhair zindagī kī rut badal ke rah ga.ī

ḳhayāl un ke saath saath der tak chalā kiyā

nazar to un ke saath thoḌī duur chal ke rah ga.ī

vo ik nigāh-e-mehr-bāñ kā iltifāt-e-muḳhtasar

andhere ghar meñ jaise koī sham.a jal ke rah ga.ī

kahāñ chaman kī sub.h meñ chaman kā husn-e-nīm-shab

kañval bikhar ke rah ga.e kalī masal ke rah ga.ī

jalā.ī thī to jo do diloñ ne ik hasīn raat meñ

vo sham.a ab bhī hai javāñ vo raat Dhal ke rah ga.ī

chaman kā pyaar mil sakā na dasht kī bahār ko

kalī bikas ke rah ga.ī sabā machal ke rah ga.ī

vo merā dil thā jo parā.ī aag meñ jalā kiyā

vo sham.a thī jo apnī aañch meñ pighal ke rah ga.ī

har ek jāñ-gudāz ġham kā mā-hasal yahī rahā

ki ġham ke mashġhaloñ meñ zindagī bahal ke rah ga.ī

'shamīm' un kī ik jhalak bhī tā sahar na mil sakī

nigāh-e-shauq karvaTeñ badal badal ke rah ga.ī

chaman lahak ke rah gaya ghaTa machal ke rah gai

tere baghair zindagi ki rut badal ke rah gai

KHayal un ke sath sath der tak chala kiya

nazar to un ke sath thoDi dur chal ke rah gai

wo ek nigah-e-mehr-ban ka iltifat-e-muKHtasar

andhere ghar mein jaise koi shama jal ke rah gai

kahan chaman ki subh mein chaman ka husn-e-nim-shab

kanwal bikhar ke rah gae kali masal ke rah gai

jalai thi to jo do dilon ne ek hasin raat mein

wo shama ab bhi hai jawan wo raat Dhal ke rah gai

chaman ka pyar mil saka na dasht ki bahaar ko

kali bikas ke rah gai saba machal ke rah gai

wo mera dil tha jo parai aag mein jala kiya

wo shama thi jo apni aanch mein pighal ke rah gai

har ek jaan-gudaz gham ka ma-hasal yahi raha

ki gham ke mashghalon mein zindagi bahal ke rah gai

'shamim' un ki ek jhalak bhi ta sahar na mil saki

nigah-e-shauq karwaTen badal badal ke rah gai