chaman mein aatish-e-gul bhi nahin dhuan bhi nahin

chaman meñ ātish-e-gul bhī nahīñ dhuāñ bhī nahīñ

bahār to ye nahīñ hai magar ḳhizāñ bhī nahīñ

bichhaḌ ga.e haiñ kahāñ ham-safar ḳhudā jaane

nuqūsh-e-pā bhī nahīñ gard-e-kārvāñ bhī nahīñ

tavāf-e-ka.aba kiyā but-kada bhī dekh aa.e

sukūn-e-qalb yahāñ bhī nahīñ vahāñ bhī nahīñ

qafas hai gosha-e-rāhat qafas hai dār-e-amāñ

ġham-e-chaman bhī nahīñ fikr-e-āshiyāñ bhī nahīñ

kahāñ ke giit kahāñ kī ġhazal ki ham-suḳhano

bahut dinoñ se hameñ jur.at-e-fuġhāñ bhī nahīñ

chaman mein aatish-e-gul bhi nahin dhuan bhi nahin

bahaar to ye nahin hai magar KHizan bhi nahin

bichhaD gae hain kahan ham-safar KHuda jaane

nuqush-e-pa bhi nahin gard-e-karwan bhi nahin

tawaf-e-kaba kiya but-kada bhi dekh aae

sukun-e-qalb yahan bhi nahin wahan bhi nahin

qafas hai gosha-e-rahat qafas hai dar-e-aman

gham-e-chaman bhi nahin fikr-e-ashiyan bhi nahin

kahan ke git kahan ki ghazal ki ham-suKHano

bahut dinon se hamein jurat-e-fughan bhi nahin