chaman mein ab koi ai dost zindagi na rahi

chaman meñ ab koī ai dost zindagī na rahī

guloñ meñ rang bahāroñ meñ dilkashī na rahī

kahāñ banā.eñ nasheman qafas se chhuTne par

ki ab chaman meñ koī aisī shāḳh hī na rahī

ġham-e-hayāt ne saarā lahū nichoḌ liyā

charāġh-e-ḳhāna-e-muflis meñ raushnī na rahī

tumhāre sāmne har haal meñ jiye lekin

tumhāre baad tamannā-e-zindagī na rahī

sharāb-e-nāb hai saaqī bhī hai muġhannī bhī

magar diloñ meñ tamannā-e-mai-kashī na rahī

ye kaifiyat hī rahī un kī mahfil-e-nau meñ

charāġh jalte rahe aur raushnī na rahī

tamām umr guzārī hai rah-navardī meñ

junūn-e-shauq meñ manzil kī yaad bhī na rahī

uTh aur ashk-e-mohabbat se kar vuzū 'armān'

sahar qarīb hai tāroñ meñ raushnī na rahī

chaman mein ab koi ai dost zindagi na rahi

gulon mein rang bahaaron mein dilkashi na rahi

kahan banaen nasheman qafas se chhuTne par

ki ab chaman mein koi aisi shaKH hi na rahi

gham-e-hayat ne sara lahu nichoD liya

charagh-e-KHana-e-muflis mein raushni na rahi

tumhaare samne har haal mein jiye lekin

tumhaare baad tamanna-e-zindagi na rahi

sharab-e-nab hai saqi bhi hai mughanni bhi

magar dilon mein tamanna-e-mai-kashi na rahi

ye kaifiyat hi rahi un ki mahfil-e-nau mein

charagh jalte rahe aur raushni na rahi

tamam umr guzari hai rah-nawardi mein

junun-e-shauq mein manzil ki yaad bhi na rahi

uTh aur ashk-e-mohabbat se kar wuzu 'arman'

sahar qarib hai taron mein raushni na rahi