chaman mein gul-fishani ho rahi hai

chaman meñ gul-fishānī ho rahī hai

havā kī mehrbānī ho rahī hai

yahāñ maiñ qatra qatra ghul rahā huuñ

mohabbat paanī paanī ho rahī hai

maiñ aksar niiñd meñ Darne lagā huuñ

mirī beTī siyānī ho rahī hai

hamāre bachche bhī paḌh likh rahe haiñ

tumheñ kyoñ bad-gumānī ho rahī hai

idhar mehmān aksar aa rahe haiñ

udhar chādar purānī ho rahī hai

unheñ palkoñ pe rakkhā hai biThā kar

anokhī mezbānī ho rahī hai

abhī tak 'nazr' kī palkeñ haiñ bhārī

bayāñ shab kī kahānī ho rahī hai

chaman mein gul-fishani ho rahi hai

hawa ki mehrbani ho rahi hai

yahan main qatra qatra ghul raha hun

mohabbat pani pani ho rahi hai

main aksar nind mein Darne laga hun

meri beTi siyani ho rahi hai

hamare bachche bhi paDh likh rahe hain

tumhein kyon bad-gumani ho rahi hai

idhar mehman aksar aa rahe hain

udhar chadar purani ho rahi hai

unhen palkon pe rakkha hai biTha kar

anokhi mezbani ho rahi hai

abhi tak 'nazr' ki palken hain bhaari

bayan shab ki kahani ho rahi hai