chaman mein rahne de kaun aashiyan nahin malum

chaman meñ rahne de kaun āshiyāñ nahīñ mā'lūm

nihāl kis ko kare bāġhbāñ nahīñ mā'lūm

mire sanam kā kisī ko makāñ nahīñ mā'lūm

ḳhudā kā naam sunā hai nishāñ nahīñ mā'lūm

aḳhīr ho ga.e ġhaflat meñ din javānī ke

bahār-e-umr huī kab ḳhizāñ nahīñ mā'lūm

ye ishtiyāq-e-shahādat meñ mahv thā dam-e-qatl

lage haiñ zaḳhm badan par kahāñ nahīñ mā'lūm

sunā jo zikr-e-ilāhī to us sanam ne kahā

'ayāñ ko jānte haiñ ham nihāñ nahīñ mā'lūm

kiyā hai kis ne tarīq-e-sulūk se āgāh

murīd kis kā hai pīr-e-muġhāñ nahīñ mā'lūm

mirī tarah to nahīñ us ko 'ishq kā āzār

ye zard rahtī hai kyuuñ za.afarāñ nahīñ mā'lūm

jahān o kār-e-jahāñ se huuñ be-ḳhabar maiñ mast

zamīñ kidhar hai kahāñ āsmāñ nahīñ mā'lūm

supurd kis ke mire baa'd ho amānat-e-ishq

uThā.e kaun ye bār-e-girāñ nahīñ mā'lūm

ḳhamosh aisā huā huuñ maiñ kam-dimāġhī se

dahan meñ hai ki nahīñ hai zabāñ nahīñ mā'lūm

mirī tumhārī mohabbat hai shohra-e-āfāq

kise haqīqat-e-māh-o-katāñ nahīñ mā'lūm

kis aa.ine meñ nahīñ jalva-gar tirī timsāl

tujhe samajhte haiñ ham īn-o-āñ nahīñ mā'lūm

milā thā ḳhizr ko kis tarah chashma-e-haivāñ

hameñ to yaar kā apne dahāñ nahīñ mā'lūm

khulī hai ḳhāna-e-sayyād meñ hamārī aañkh

qafas ko jānte haiñ āshiyāñ nahīñ mā'lūm

tarīq-e-'ishq meñ dīvāna-vār phirtā huuñ

ḳhabar gaḌhe kī nahīñ hai kuaañ nahīñ mā'lūm

jo ho to shauq hī ho kū-e-yār kā haadī

kisī ko varna sabīl-e-jināñ nahīñ mā'lūm

dahan meñ aap ke albatta ham ko hujjat hai

kamar kā bhed jo pūchhūñ miyāñ nahīñ mā'lūm

nasīm-e-sub.h ne kaisā ye us ko bhaḌkāyā

hanūz ātish-e-gul kā dhuāñ nahīñ mā'lūm

suneñge vāqi'a us kā zabān-e-sausan se

shahīd kis kā hai ye arġhavāñ nahīñ mā'lūm

kanār-e-āb chale daur-e-jām yā lab-e-kisht

shikār hove bat-e-mai kahāñ nahīñ mā'lūm

rasā.ī jis kī nahīñ ai sanam dar-e-dil tak

yaqīñ hai us ko tirā āstāñ nahīñ mā'lūm

'ajab nahīñ hai jo ahl-e-suḳhan hoñ gosha-nashīñ

kisī dahan meñ zabāñ kā makāñ nahīñ mā'lūm

chhuTeñge ziist ke phande se kis din ai 'ātish'

janāza hogā kab apnā ravāñ nahīñ mā'lūm

chaman mein rahne de kaun aashiyan nahin ma'lum

nihaal kis ko kare baghban nahin ma'lum

mere sanam ka kisi ko makan nahin ma'lum

KHuda ka nam suna hai nishan nahin ma'lum

aKHir ho gae ghaflat mein din jawani ke

bahaar-e-umr hui kab KHizan nahin ma'lum

ye ishtiyaq-e-shahadat mein mahw tha dam-e-qatl

lage hain zaKHm badan par kahan nahin ma'lum

suna jo zikr-e-ilahi to us sanam ne kaha

'ayan ko jaante hain hum nihan nahin ma'lum

kiya hai kis ne tariq-e-suluk se aagah

murid kis ka hai pir-e-mughan nahin ma'lum

meri tarah to nahin us ko 'ishq ka aazar

ye zard rahti hai kyun zafaran nahin ma'lum

jahan o kar-e-jahan se hun be-KHabar main mast

zamin kidhar hai kahan aasman nahin ma'lum

supurd kis ke mere ba'd ho amanat-e-ishq

uThae kaun ye bar-e-giran nahin ma'lum

KHamosh aisa hua hun main kam-dimaghi se

dahan mein hai ki nahin hai zaban nahin ma'lum

meri tumhaari mohabbat hai shohra-e-afaq

kise haqiqat-e-mah-o-katan nahin ma'lum

kis aaine mein nahin jalwa-gar teri timsal

tujhe samajhte hain hum in-o-an nahin ma'lum

mila tha KHizr ko kis tarah chashma-e-haiwan

hamein to yar ka apne dahan nahin ma'lum

khuli hai KHana-e-sayyaad mein hamari aankh

qafas ko jaante hain aashiyan nahin ma'lum

tariq-e-'ishq mein diwana-war phirta hun

KHabar gaDhe ki nahin hai kuan nahin ma'lum

jo ho to shauq hi ho ku-e-yar ka hadi

kisi ko warna sabil-e-jinan nahin ma'lum

dahan mein aap ke albatta hum ko hujjat hai

kamar ka bhed jo puchhun miyan nahin ma'lum

nasim-e-subh ne kaisa ye us ko bhaDkaya

hanuz aatish-e-gul ka dhuan nahin ma'lum

sunenge waqi'a us ka zaban-e-sausan se

shahid kis ka hai ye arghawan nahin ma'lum

kanar-e-ab chale daur-e-jam ya lab-e-kisht

shikar howe bat-e-mai kahan nahin ma'lum

rasai jis ki nahin ai sanam dar-e-dil tak

yaqin hai us ko tera aastan nahin ma'lum

'ajab nahin hai jo ahl-e-suKHan hon gosha-nashin

kisi dahan mein zaban ka makan nahin ma'lum

chhuTenge zist ke phande se kis din ai 'atish'

janaza hoga kab apna rawan nahin ma'lum