chaman mein the jo chaman hi ki dastan sunte

chaman meñ the jo chaman hī kī dāstān sunte

koī navā koī naġhma koī fuġhāñ sunte

qadam na chhoḌte rāhoñ ko tā-ba-manzil-e-shauq

hamārī baat jo ye ahl-e-kārvāñ sunte

tire qalam se to gulzār-e-be-navā kā qafas

tirī zabāñ se bhī kuchh hāl-e-be-zabāñ sunte

hamāre dard kā tūfāñ kahāñ kahāñ na uThā

ye shor aap jahāñ chāhte vahāñ sunte

ik umr apnī bhī guzrī hai ai chaman vaalo

guloñ ke kunj meñ andesha-e-ḳhizāñ sunte

kisī kā rañj kisī kā alam kisī kā malāl

ab aur kyā thā jo ham zer-e-āsmāñ sunte

guloñ se bach ke chale bulbuloñ se katrā.e

vo merā qissa-e-ḳhūnīñ kahāñ kahāñ sunte

kuchh is meñ apnā bhī soz-e-bayāñ thā ai 'jazbī'

vagarna log kab afsāna-e-jahāñ sunte

chaman mein the jo chaman hi ki dastan sunte

koi nawa koi naghma koi fughan sunte

qadam na chhoDte rahon ko ta-ba-manzil-e-shauq

hamari baat jo ye ahl-e-karwan sunte

tere qalam se to gulzar-e-be-nawa ka qafas

teri zaban se bhi kuchh haal-e-be-zaban sunte

hamare dard ka tufan kahan kahan na uTha

ye shor aap jahan chahte wahan sunte

ek umr apni bhi guzri hai ai chaman walo

gulon ke kunj mein andesha-e-KHizan sunte

kisi ka ranj kisi ka alam kisi ka malal

ab aur kya tha jo hum zer-e-asman sunte

gulon se bach ke chale bulbulon se katrae

wo mera qissa-e-KHunin kahan kahan sunte

kuchh is mein apna bhi soz-e-bayan tha ai 'jazbi'

wagarna log kab afsana-e-jahan sunte