چمن میں اس گل رعنا سے گفتگو تو ہوئی

چمن میں اس گل رعنا سے گفتگو تو ہوئی

کہیں کی بات سہی شرح آرزو تو ہوئی

جہان عشق میں کچھ فکر و جستجو تو ہوئی

ادھر بھی جذبۂ بے تاب کی نمو تو ہوئی

نظر کے سامنے آئینۂ جمال رہا

نیاز عشق کی آج اتنی آبرو تو ہوئی

بہ فیض سوز یقیں ہم ترے قریب آئے

تجلیٔ مہ نادیدہ رو بہ رو تو ہوئی

بتان عرش تھے دیر و حرم میں افسانہ

وہ ہم کہ جادہ و منزل کی جستجو تو ہوئی

چمن چمن ہیں ترے یاد کے حسیں لمحے

شب فراق بھی مانوس رنگ و بو تو ہوئی

غرور حسن بہت بڑھ گیا مگر سیفیؔ

رموز عشق پہ جی بھر کے گفتگو تو ہوئی