chaman sa dasht ta-hadd-e-nazar kitna hasin hai

chaman sā dasht tā-hadd-e-nazar kitnā hasīñ hai

tū merā ham-qadam hai to safar kitnā hasīñ hai

mirī jānib lapaktī manziloñ se pūchh lenā

kisī ke saath chalne kā hunar kitnā hasīñ hai

vo mere sāmne baiThā huā hai merā ho kar

duā-e-nīm-shab kā ye asar kitnā hasīñ hai

zahe qismat ki saaye daar bhī hai bā samar bhī

mire sar par mohabbat kā shajar kitnā hasīñ hai

ajab ḳhvāb āshnā āñkheñ huī haiñ vasl kī shab

khulī hai aañkh to rañg-e-sahar kitnā hasīñ hai

maiñ hañstī kheltī huuñ jis ke ḳhvāb nā-rasā meñ

mirā ehsās hasrat hai magar kitnā hasīñ hai

nahīñ hai 'nāz' kam jannat se merā āshiyāna

mohabbat se muzayyan merā ghar kitnā hasīñ hai

chaman sa dasht ta-hadd-e-nazar kitna hasin hai

tu mera ham-qadam hai to safar kitna hasin hai

meri jaanib lapakti manzilon se puchh lena

kisi ke sath chalne ka hunar kitna hasin hai

wo mere samne baiTha hua hai mera ho kar

dua-e-nim-shab ka ye asar kitna hasin hai

zahe qismat ki saye dar bhi hai ba samar bhi

mere sar par mohabbat ka shajar kitna hasin hai

ajab KHwab aashna aankhen hui hain wasl ki shab

khuli hai aankh to rang-e-sahar kitna hasin hai

main hansti khelti hun jis ke KHwab na-rasa mein

mera ehsas hasrat hai magar kitna hasin hai

nahin hai 'naz' kam jannat se mera aashiyana

mohabbat se muzayyan mera ghar kitna hasin hai