چمن سے دور ہوا کی امان سے باہر

چمن سے دور ہوا کی امان سے باہر

کیا ہے ہم نے بسیرا اڑان سے باہر

گھروں میں گھس کے ہوا توڑ پھوڑ کرتی رہی

کھڑی تھی دھوپ مگر سائبان سے باہر

وہ ہم ہی تھے جو ہوا میں چراغ لے کے چلے

قدم ہمیں نے نکالے مکان سے باہر

پڑی ہیں ہاتھوں میں عہد دعا کی ہتھکڑیاں

وگرنہ ہم بھی گئے تھے مکان سے باہر

تمہارے شہر سے اچھا ہمارا جنگل ہے

ذرا نکل کے تو دیکھو مچان سے باہر

بچھڑ کے تم سے تو ہم ایسے ٹوٹ پھوٹ گئے

شکستہ تیر ہو جیسے کمان سے باہر

وہ خواہشوں کا سمندر زبان سے عاری

وہ پورے چاند کا منظر بیان سے باہر

عطا ہوئی ہمیں باقرؔ لبوں کی آزادی

پر ایک لفظ نہ نکلا زبان سے باہر