chaman se dur hawa ki aman se bahar

chaman se duur havā kī amaan se bāhar

kiyā hai ham ne baserā uḌaan se bāhar

gharoñ meñ ghus ke havā toḌ-phoḌ kartī rahī

khaḌī thī dhuup magar sā.ebān se bāhar

vo ham hī the jo havā meñ charāġh le ke chale

qadam hamīñ ne nikāle makān se bāhar

paḌī haiñ hāthoñ meñ 'ahd-e-du'ā kī hathkaḌiyāñ

vagarna ham bhī ga.e the makān se bāhar

tumhāre shahr se achchhā hamārā jangal hai

zarā nikal ke to dekho machān se bāhar

bichhaḌ ke tum se to ham aise TūT-phūT ga.e

shikasta tiir ho jaise kamān se bāhar

vo ḳhvāhishoñ kā samundar zabān se 'aarī

vo puure chāñd kā manzar bayān se bāhar

'atā huī hameñ 'bāqar' laboñ kī āzādī

par ek lafz na niklā zabān se bāhar

chaman se dur hawa ki aman se bahar

kiya hai hum ne basera uDan se bahar

gharon mein ghus ke hawa toD-phoD karti rahi

khaDi thi dhup magar saeban se bahar

wo hum hi the jo hawa mein charagh le ke chale

qadam hamin ne nikale makan se bahar

paDi hain hathon mein 'ahd-e-du'a ki hathkaDiyan

wagarna hum bhi gae the makan se bahar

tumhaare shahr se achchha hamara jangal hai

zara nikal ke to dekho machan se bahar

bichhaD ke tum se to hum aise TuT-phuT gae

shikasta tir ho jaise kaman se bahar

wo KHwahishon ka samundar zaban se 'ari

wo pure chand ka manzar bayan se bahar

'ata hui hamein 'baqar' labon ki aazadi

par ek lafz na nikla zaban se bahar