chaman se KHushbuon ka istiara le gaya koi

chaman se ḳhushbuoñ kā isti.āra le gayā koī

hamāre gulsitāñ se rang saarā le gayā koī

hameñ jo raah dikhlātā thā jīvan ke añdheroñ meñ

hamāre āsmāñ se vo sitāra le gayā koī

bahut vīrān rahtā hai falak āñkhoñ kā ye jab se

churā kar us se us kā māh-pāra le gayā koī

bhalā ab zindagī meñ dekhne ko kyā rahā baaqī

jo bhātā thā hameñ vo har nazāra le gayā koī

lagegī paar kaise naav ab ye ḳhudā jaane

use mañjdhār meñ rakh kar kināra le gayā koī

badal detā thā jo meñDak ko ik raaja kī sūrat meñ

jahāñ se ab vo jaadū kā piTārā le gayā koī

dil-e-betāb ko 'madhuman' qarār aa.e bhī to kaise

sukūñ to chhīn kar ham se hamārā le gayā koī

chaman se KHushbuon ka istiara le gaya koi

hamare gulsitan se rang sara le gaya koi

hamein jo rah dikhlata tha jiwan ke andheron mein

hamare aasman se wo sitara le gaya koi

bahut viran rahta hai falak aankhon ka ye jab se

chura kar us se us ka mah-para le gaya koi

bhala ab zindagi mein dekhne ko kya raha baqi

jo bhata tha hamein wo har nazara le gaya koi

lagegi par kaise naw ab ye KHuda jaane

use manjdhaar mein rakh kar kinara le gaya koi

badal deta tha jo meinDak ko ek raja ki surat mein

jahan se ab wo jadu ka piTara le gaya koi

dil-e-betab ko 'madhuman' qarar aae bhi to kaise

sukun to chhin kar hum se hamara le gaya koi