چمن طراز بہاروں میں بھی سکوں نہ ملا

چمن طراز بہاروں میں بھی سکوں نہ ملا

مگر گلوں سے وہ رخسار لالہ گوں نہ ملا

اسی سبب سے جنوں کو خرد سمجھ نہ سکی

جہان میں جسے حکمت ملی جنوں نہ ملا

چٹک گلوں کی صدائے شکست دل سے ملی

مگر گلوں کا دل خوں شدہ سے خوں نہ ملا

زباں پہ عہد وفا ہے نظر میں عزم جفا

مجاز اپنی حقیقت سے آہ کیوں نہ ملا

مجاز عین حقیقت مری نگاہ میں ہے

تری نگاہ سے تیرا بیان کیوں نہ ملا

مجھے یہ کس نے فریب سکوں دیا ہے ذہینؔ

اگر سکوں نہ ملے تو نہ کہہ سکوں نہ ملا