chaman wala jo andaz-e-chaman ka qadr-dan rahta

chaman vaalā jo andāz-e-chaman kā qadr-dāñ rahtā

na phūloñ par jafā hotī na zad meñ āshiyāñ rahtā

bahāreñ muskurātīñ mehrbāñ gar bāġhbāñ rahtā

chaman kī Daalī Daalī par hamārā āshiyāñ rahtā

usūl-e-mai-kashī sab siikh letā jām-o-mīnā se

jo vaa.iz bhī sharīk-e-halqa-e-pīr-e-muġhāñ rahtā

chamak uThtā muqaddar saath detī nā-rasā qismat

jo firdaus-e-nazar ban kar kisī kā āstāñ rahtā

chalo achchhā huā dil ne har ik sūrat miTā Daalī

hujūm-e-shauq meñ kār-e-jahāñ bār-e-garāñ rahtā

bahal jaatā hai dil vīrānī-e-dasht-o-bayābāñ se

na hote ye manāzir to tirā vahshī kahāñ rahtā

mirī rangīñ bayānī lutf detī bazm-e-sāqī meñ

jo rahte ik taraf tum ik taraf pīr-e-muġhāñ rahtā

vatan ke TukḌe TukḌe karne vāloñ se koī pūchhe

tabāhī kyoñ ye aatī ek agar hindostāñ rahtā

mohabbat merī rusvā.ī kā baa.is ban ga.ī 'aslam'

bahut achchhā thā is se maiñ jo benām-o-nishāñ rahtā

chaman wala jo andaz-e-chaman ka qadr-dan rahta

na phulon par jafa hoti na zad mein aashiyan rahta

bahaaren muskuraatin mehrban gar baghban rahta

chaman ki Dali Dali par hamara aashiyan rahta

usul-e-mai-kashi sab sikh leta jam-o-mina se

jo waiz bhi sharik-e-halqa-e-pir-e-mughan rahta

chamak uThta muqaddar sath deti na-rasa qismat

jo firdaus-e-nazar ban kar kisi ka aastan rahta

chalo achchha hua dil ne har ek surat miTa Dali

hujum-e-shauq mein kar-e-jahan bar-e-garan rahta

bahal jata hai dil virani-e-dasht-o-bayaban se

na hote ye manazir to tera wahshi kahan rahta

meri rangin bayani lutf deti bazm-e-saqi mein

jo rahte ek taraf tum ek taraf pir-e-mughan rahta

watan ke TukDe TukDe karne walon se koi puchhe

tabahi kyon ye aati ek agar hindostan rahta

mohabbat meri ruswai ka bais ban gai 'aslam'

bahut achchha tha is se main jo benam-o-nishan rahta