chamke hue hain diwar-o-dar raunaq hai bazaron mein

chamke hue haiñ dīvār-o-dar raunaq hai bāzāroñ meñ

kaise kaise log aa.e haiñ kaisī kaisī caroñ meñ

maiñ to us ke sāmne baiThā us kā chehra paḌhtā thā

jaane vo kyā DhūñD rahā thā añgrezī aḳhbāroñ meñ

vo bhī din the jab har chhuTTī tere saath guzartī thī

aaj magar rakkhā hī kyā hai haftoñ aur itvāroñ meñ

jaane kis farhād kā tesha kis ke jigar ko chiir gayā

ḳhuun kī dhāreñ dekh rahā huuñ patthar kī dīvāroñ meñ

jin logoñ ke aql-o-hunar kī dhuum machī thī aalam meñ

un ko bhī dekhā hai rusvā shāhoñ ke darbāroñ meñ

phuul se chehre shāḳh sī bāñheñ jab galiyoñ meñ miltī haiñ

kaun bhalā phir sair ko jaa.e hare-bhare gulzāroñ meñ

to merī ma.asūm nazar ko bul-havasī kā dosh na de

maiñ to ḳhud ko dekh rahā huuñ tere hasīñ ruḳhsāroñ meñ

aao un ko bāhar lā kar taaza havā meñ biThlā.eñ

log chhupe baiThe haiñ kab se apnī zaat ke ġhāroñ meñ

ab ke to 'betāb' murī meñ kuchh kuchh aag barastī thī

jalte sahrā aa nikle the bhīge hue kohsāroñ meñ

chamke hue hain diwar-o-dar raunaq hai bazaron mein

kaise kaise log aae hain kaisi kaisi caron mein

main to us ke samne baiTha us ka chehra paDhta tha

jaane wo kya DhunD raha tha angrezi aKHbaron mein

wo bhi din the jab har chhuTTi tere sath guzarti thi

aaj magar rakkha hi kya hai hafton aur itwaron mein

jaane kis farhad ka tesha kis ke jigar ko chir gaya

KHun ki dhaaren dekh raha hun patthar ki diwaron mein

jin logon ke aql-o-hunar ki dhum machi thi aalam mein

un ko bhi dekha hai ruswa shahon ke darbaron mein

phul se chehre shaKH si banhen jab galiyon mein milti hain

kaun bhala phir sair ko jae hare-bhare gulzaron mein

to meri masum nazar ko bul-hawasi ka dosh na de

main to KHud ko dekh raha hun tere hasin ruKHsaron mein

aao un ko bahar la kar taza hawa mein biThlaen

log chhupe baiThe hain kab se apni zat ke ghaaron mein

ab ke to 'betab' muri mein kuchh kuchh aag barasti thi

jalte sahra aa nikle the bhige hue kohsaron mein