chanaren wadiyon mein mushtail hain

chanāreñ vādiyoñ meñ mushta.il haiñ

dareġhā sarv abhī tak pā-ba-gil haiñ

uThe haiñ lāla-e-ḳhūnīñ-kafan phir

yahī sho.ale jahān-e-mustaqil haiñ

agar do-gām par manzil hai phir kyuuñ

chaTāneñ zindagī kī munfa.il haiñ

guloñ par be-dilī kā rañg kyuuñ hai

anādil sahn-e-gulshan meñ ḳhajil haiñ

rafū ho jā.eñge chāk-e-bahārāñ

ḳhizāñ ke ghaav dekho mundamil haiñ

khanakte hī rahe shīshe to kis kaam

laboñ tak jaam jā pahuñcheñ to dil haiñ

ga.e manzil-ba-manzil daar tak ham

marāhil ishq ke kab jāñ-gusil haiñ

mile haiñ ba.ad muddat ke to jaanā

bahut apne kiye par munfa.il haiñ

Thikāna kyā hai aise dostoñ kā

muqābil haiñ na mere muttasil haiñ

chanaren wadiyon mein mushtail hain

daregha sarw abhi tak pa-ba-gil hain

uThe hain lala-e-KHunin-kafan phir

yahi shoale jahan-e-mustaqil hain

agar do-gam par manzil hai phir kyun

chaTanen zindagi ki munfail hain

gulon par be-dili ka rang kyun hai

anadil sahn-e-gulshan mein KHajil hain

rafu ho jaenge chaak-e-bahaaran

KHizan ke ghaw dekho mundamil hain

khanakte hi rahe shishe to kis kaam

labon tak jam ja pahunchen to dil hain

gae manzil-ba-manzil dar tak hum

marahil ishq ke kab jaan-gusil hain

mile hain baad muddat ke to jaana

bahut apne kiye par munfail hain

Thikana kya hai aise doston ka

muqabil hain na mere muttasil hain