چند آنسو آنکھ سے گرنا قیامت ہو گئے

چند آنسو آنکھ سے گرنا قیامت ہو گئے

ہم ہمیشہ کے لیے محروم راحت ہو گئے

ان کے جلوے میرے غم خانہ کی زینت ہو گئے

دل کے ہر گوشے میں روشن داغ حسرت ہو گئے

اب کہے گا کون ان سے میرے غم کی داستاں

شمع جل کر بجھ گئی تارے بھی رخصت ہو گئے

تم تو اپنے تھے تمہیں تو ساتھ دینا تھا مرا

تم زمانے کی طرح کیوں بے مروت ہو گئے

میری سچی بات بھی افسانہ بن کر رہ گئی

ان کے افسانے بھی جتنے تھے حقیقت ہو گئے

اب یہ عالم ہے مرا افگنؔ مذاق یار میں

غم کی صورت میں نہیں غم میری صورت ہو گئے