chand aansu aankh se girna qayamat ho gae

chand aañsū aañkh se girnā qayāmat ho ga.e

ham hamesha ke liye mahrūm-e-rāhat ho ga.e

un ke jalve mere ġham-ḳhāne kī zīnat ho ga.e

dil ke har goshe meñ raushan dāġh-e-hasrat ho ga.e

ab kahegā kaun un se mere ġham kī dāstāñ

sham' jal kar bujh ga.ī taare bhī ruḳhsat ho ga.e

tum to apne the tumheñ to saath denā thā mirā

tum zamāne kī tarah kyoñ be-muravvat ho ga.e

merī sachchī baat bhī afsāna ban kar rah ga.ī

un ke afsāne bhī jitne the haqīqat ho ga.e

ab ye 'ālam hai mirā 'afgan' mazāq-e-yār meñ

ġham kī sūrat maiñ nahīñ ġham merī sūrat ho ga.e

chand aansu aankh se girna qayamat ho gae

hum hamesha ke liye mahrum-e-rahat ho gae

un ke jalwe mere gham-KHane ki zinat ho gae

dil ke har goshe mein raushan dagh-e-hasrat ho gae

ab kahega kaun un se mere gham ki dastan

sham' jal kar bujh gai tare bhi ruKHsat ho gae

tum to apne the tumhein to sath dena tha mera

tum zamane ki tarah kyon be-murawwat ho gae

meri sachchi baat bhi afsana ban kar rah gai

un ke afsane bhi jitne the haqiqat ho gae

ab ye 'alam hai mera 'afgan' mazaq-e-yar mein

gham ki surat main nahin gham meri surat ho gae